Кугланата Мусандра се наоѓа во сутеренот на Градскиот Трговски Центар. Пуштена е во употреба во октомври 1974, неполна година по официјалното отворање на Трговскиот Центар. Направена е комплетно од тогашниот реномиран бренд Schmid. 

Како еден од најубавите кугларски објекти во тогашна СФРЈ, кугланата ја има честа да биде домаќин на поединечното првенство на Југославија веќе следниот месец по отворањето. На настанот земаат учество најдобрите куглари од републиката меѓу кои и легендарниот Никола Драгаш. Драгаш е легенда во кугларскиот спорт и познат како светски шампион три години последователно – `72, 73, и `74.

На Мусандра истовремено започнува натпреварување во градски рамки. Градската лига во 1978 година ќе прерасне во македонска кугларска лига која ќе се одржува по системот 6×200 кугли.

Во 1998 година, Мусандра е реновирана од корен и таа станува FUNK куглана по сите најнови и модерни светски стандарди. Следната година на неа се одржува светскиот поединечен куп, а во 2000-та и Европапокалот, кое е едно од најважните екипни натпреварувања во куглањето. Екипата на Вардар се пласираше во силниот фајнал-фор на турнирот.